Skip to main content

UPACARA TEMU PENGANTIN PADA PERNIKAHAN JAWA ADAT SURAKARTA (PANGGIH)


ATURIPUN PAMBIWARA SAK SAMPUNIPUN UPACARA PASRAH TINAMPI KALAJENGAKEN ATUR BADHE PANGGIHING TEMANTEN

Para tamu ingkang satuhu sadu budi, upacara pasrah tinampen sampun paripurna, karana sampun tuntas dumugining pada atur panampining pasrah ingkang kasarira Bapa ...................., ingkang salajengipun nunten badhe katindhakaken upacara panggih miturut adat widi widana ingkang sampun lumampah ing mriki. Ingkang kepareng hamanggihaken temanten panjenenganipun Ibu ......................., ingkang nyawisaken ubarampe Ibu ..................., ingkang kasuwun ngapit temanten putri Ibu ................. lan Ibu ..................... Wondene ingkang kasuwun ngapit temanten kakung Bapa ............... lan Bapa ................. Katur dhumateng para tamu kakung putri, saiba badhe suka gambiraning manah menggahipung ingkang hamengku gati, hambok bilih anggenipun paring pangestu wonten ing acara panggih, para tamu sedaya kepareng jumeneng, ingkang menika sumangga kula dherek’aken. Tumapaking upacara panggih kula sumanggakaken Ibu ................., hingurmatan swantening gangsa kodhok ngorek, mugi Gusti Ingkang maha Agung hangijabahi. (Mungel gangsa kodhok ngorek, pambiwara lajeng nyandra).




CONTOH CANDRANIPUN TEMANTEN PANGGIH DENING PANATACARA

Hawit saking sih wilasaning Gusti Ingkang Maha Mirah lan Maha Asih, kaya wus dumugi wahyaning mangsa kala panggihing pinanganten kakung miwah pinanganten putri, ingkang mastuti ila-ila dawuhing para kina kang wus cinandhi ing awiyat jinempana angin, saha nulat edi endahing budaya luhur, marsudi mardawaneng budaya tulus. Budaya ateges budi lan daya ingkang tuwuh saking osiking panggalih, tulus hamengku werdi saliring pangesti tumuju ing kahutaman. Kawuryan pinanganten putri wus jengkar saking sasana rinenggo kinanthi dening pangembaning pinanganten, tumuju papan sinengker, inggih papan ingkang kangge manggihaken temante.
Swaraning pradangga munya hangrangin kadi asung pepuji mring pinanganten kekalih murih kang kaesti dadi kang sinedya teka. Saya caket – saya caket anggenya sami lumaksana temanten kekalihipun sampun sami apagut tingal. Tempuking pandulu catur netra mahanani rasa geter ing sanubari, manunggaling rasa tresna lan asih sinurung kasmaran ing penggalih, marmane datan bisa cinitra ing ukara. Temanten kakung putri tumunten sami balang-balangan gantal, ingkang dumadi saking roning sedah temu rose kalinting tinangsulan lawe wenang, gantal kang kabalangaken temanten putri winastan gondhang kasih, wondene gantal kang kabalangaken temanten kakung winastan gondang tutur.
Prapteng papaning panggih wus kacawisaken tirto wening mungging bokor sinebaran puspa tri warna, sekar mawar, sekar melathi miwah sekar kanthil, mujudaken satunggaling sasmita menggahing temanten sekaliyan ingkang sampun pinasthi jinodho hawit saking karsanipun Gusti, lamun winawar ing tembung manis saking kedhaling lathi mahanani kumanthil-kanthil blebesing ati. Pramila samubarang pakarti mugi tansah linambaran budi kang wening, wijiling pangandika kumedaling lathi mugi tansah ngati-ati murih hambabar pakarti ingkang premati. Mekaten temanten tumuten tangkep sata sinartan puji donga dening ibu / bapak ingkang manggihaken, ing pamuji nyuwun dhumateng ngarsanipun Gusti Ingkang Maha Suci mugi-mugi temanten sekaliyan manggih bagya mulya nunten pinaringan tuwuhing wiji, marmane temanten kakung nunten midhak antiga pecah sakala. Nulya temanten putri laju hanjengku amijiki samparanipun ingkang raka, jroning batos sagedto mbucal sukerta ingkang dumunung wonten hangganipun temanten kakung. Sawusnya temanten putri sembah kalbu tumunten kajumenengaken dening ingkang raka. Temanten kakung putri jajar sumanding nunten siningepan sindur ingkang warni gula klapa dening ingkang ibu, sigra jumangkah tumuju ing pajangan, inggih ing sasana kursi rinengga, laju lampahira. Lulus raharja kalising rubeda samangke temanten sekaliyan sampun badhe nindhak’aken upacara krobongan minangka jangkeping upacara panggih. Ingkang punika katur para tamu kakung miwah putri kasuwun pinarak lenggah malih kanthi suka mardikaning panggalih.
Labels:

Comments

Post a Comment

Popular posts from this blog

KIRAB KASATRIYAN PADA ACARA PERNIKAHAN JAWA ADAT SURAKARTA

PAMBIWARA NYAOSI PIRSA BILIH PINANGANTEN SAMPUN RAMPUNG ANGGENIPUN GANTOS AGEMAN, NUNTEN BADHE KASOWANAKEN ING SASANA PAHARGYAN Para tamu ingkang winantu ing pakurmatan, pambiwara sampun nampi sasmita saking paran para, bilih wekdal menika pinanganten sampun silih busana............... Dene Ki Subamanggala, inggih Ki Manggalasuba sampun siyaga hanyowanaken pinanganten, candranipun sami katingal gembira ing wardaya prasasat sinuba-suba penggalihe. (Nunten mungel Subakastawa Sl.9). CONTOH KIRAB KASATRIYAN Suren-surem dewangkara kingkin, katawung ing himandha, bebasan soroting surya kalingan mega, padhanging swasana kendih saking busananing temanten. Duk nalika busana kanarendran katingan kados raja lan prameswari, sareng sampun busana kasatriyan candrane pinda satriya taruna ingkang ndaweg cangkrama sekaliyan garwa, mangengar-enggaring driya. Tindhakira handerek’aken manggalasuba ingkang sampun piniji, pranyata pantes kalamun kinarya tuladha. Sinten ta ingkang lumaksana ka...
Post a Comment
Read more

CONTOH MATERI PADA ACARA BUBAK KAWAH

POCAPAN TULADHA BUBAK KAWAH Hamiwiti mbubak kawah anggenipun kagungan hajat mantu Bapa.............. sekaliyan. Megaring songsong agung sinareng binukaning warana tutuping sesaji, netepi darmaning asepuh sayekti yen mantu sepisanan ngawontenaken acara bubak kawah, dene menawi wuragil ngawontenaken acara tumplak punjen. Bubak kawah den saranani mbuka kendhaga mulya, hiya den arani kendhaga kencana. Sareng binuka tutuping kendhaga ana cahya seta ingkang winastan CUPU ADI MONDHALIKA , lan wonten cahya rekta ingkang winastan CUPU MANIK ASTAGINA . Cupu Adi Mondhalika dumadi saking rahsaning bapa, Cupu Manik Astagina dumadi saking rahsaning biyung. Manunggaling rasa mulya nyarengi dhumawahing mangsakala kodrating kawasa, biyung hanggarbini. ·          Setunggal wulan hanggarbini winastan EKO KAMANDANU ·          Kalih wulan winastan DWI PANUNGGAL ·        ...
Post a Comment
Read more

ACARA SERAH TERIMA (PASRAH LAN PANAMPI)

ATURIPUN PAMBIWARA NGATURI PASRAH DHUMATENG TETUANGGANING ROMBONGAN TEMANTEN KAKUNG Para tamu kakung miwah putri ingkang satuhu bagya mulya, lulus raharja praptanipun rombongan temanten kakung samangke tetuangganing rombongan sampun pinarak jumeneng wonten ing sasana pasrah, awit saking menika sasana miwah pandayawara kasumanggakaken dhumateng tetuangganing rombongan, sumangga nuwun. CONTOH PASRAH TEMANTEN BADHE PANGGIH Assalamu’alaikum Warohmatullahi Wabarokatuh Bapa / Rakamas ............... ingkang wekdal menika ngemban wajib luhur wonten madyaning pawiwahan minangka sulih sarira panjenenganipun Bapa ................ sekaliyan garwa (ingkang mengku gati), ingkang winantu hing pakurmatan. Sowan kula wonten ngarsa panjenengan hangirit panekaring putra pinanganten kakung ginarubyuk santana warga, inggih awit kula ngemban wajib minangka dados duta sarayanipun Bapa .................... sekaliyan garwa ingkang pidalem hing .................... Sakderengipun kula ma...
Post a Comment
Read more