Skip to main content

UPACARA SUNGKEMAN


ATURIPUN PAMBIWARA BILIH BESAN SAMPUN RAWUH TUMUNTEN KALAJENGAKEN UPACARA SUNGKEMAN

Para tamu ingkang winantu ing pakurmatan, kawistara besanipun Bapa.................... inggih panjenenganipun Bapa.................. sekaliyan garwa kanthi raharja manjing sasana pawiwahan, sak sampunipun ingkang sami mangun bebesanan sami tangkep asta pratanda sampun suka pambagya, nunten kadherekaken lenggah ing palenggahan sak celakipun temanten, ingkang saperlu nampi atur pangabekti saking putra temanten. Kaleksananing upacara sungkeman kula aturaken Ibu................ kabiyantu Bapa.................. ingkang badhe nglolos wangkinganipun temanten kakung.
·         Rahayuning karya badhe kabiwadha rerepen dhandanggula. *Jika iringan memakai rerepen.
·         Asesanti mugi rahayu ingkang pinanggya. (Mungel mugi rahayu lajeng kacandra). *Jika iringan memakai gending mugi rahayu.


CONTOH PANYANDRA ENGANTEN SARIMBIT NINDAKAKEN SUNGKEMAN (Binarung Mugi Rahayu / Mijil Dempel)

Wus jengkar saking sasana rinengga penganten sarimbit, esthining manah sumedya sumungkem pepadaning ingkang rama dalasan ingkang ibu. Sigra tumungkul amarikelu yayah konjem ing bantala wadanane penganten sarimbit, tangkeping asta sumungkem ing jengku sinartan eninging cipta rumasuk ing sanubari, anyadhong rumentahing pangastawa saking rama miwah ibu.
Mrih esthining driya anggenira mangus bebrayan tansah pinaringan bagya mulya dening Gusti Ingkang Maha Welas tuwin Maha Asih.
Ingkang rama ibu dupi nampi sungkeming putra, sumedhoting wardaya tan bangkit sinayudan, sakala ingelus-elus pamidhangira penganten, winiwir-wiwir rikmane, kanthi kebak ing rasa sutrisna asih.
Kawuwusa dupi penganten nampi sihing rama ibu sanalika angles kekes kadi linolosan bebayune, kembeng-kembeng wadanane, brenel, mijil ingkang waspa, lamunta cinandra kadi mutiara rinonce, karana enget purwaning dumadi, rama ingkang sembada hangukir jiwa raga, mangka dadya lantaraning tumuwuh. Ibu ingkang wus kuwawa dadya papaning yoga brata salebeting nawa candra dasa hari, saha hanggulo wentah wiwit kalaning samana ngantya dewasa.
Rama ibu ngawuningani ingkang putra hanggenya sumungkem satemah ebahing manah saknalika brol, mijil ingkang riwe hamara wayam, yen dinuwa datan kuwawa, bebasan jegreg kadi tugu Sinukarta.
Esthining driya puji syukur konju ngarsa dalem Gusti Ingkang Maha Luhur, kanthi pangajab mugi penganten sarimbit anggenya nempuh aneng alaming bebrayan sembada ingkang sinedya, manggih suka basuki ingkang sarwi kaesti, saha enggal antuk talining brayat, wujuding pratima ingkang bangkit tata jalma, tanulyan anak anung aningdita.
Sak sampunipun penganten sumungkem pepadaning rama miwah ibu penganten putri, laju kapratitisaken sumungkem wonten ngarsanipun rama ibu penganten kakung. Lamun katurna datan prabeda nggenya sumungkem penganten sarimbit wonten ngersanipun rama ibu penganten putri.
Kapanduk ing raos suka, rama ibu ingkang dahat tumanem ing kalbu, saaksana (sanalika) jroning penggalih amung meminta wonten ngarsanipun Gusti Ingkang maha Wikan mugi penganten sekaliyan anggenya gesang bebrayan, atut runtut donya tumekeng delahan.
Paripurna anggenya ngaras pada penganten sarimbit sigra kapratitisaken wonten ing sasana rinengga, kapundhut gambaripun sesarengan kaliyan rama ibu.
Nuwun


ATURIPUN PAMBIWARA SAK SAMPUNIPUN UPACARA SUNGKEMAN RAMPUNG
Para tamu kakung putri ingkang satuhu luhuring budi, kados-kados upacara sungkeman sampun paripurna, ingkang menika kangge miyak sepining suasana miwah kangge nyugata murih handadosaken lelipuring wardaya kagem para tamu, badhe kaaturaken gumelaring (lelangen beksan gambyong). Katur para tamu sugeng hamirsani.
Labels:

Comments

Post a Comment

Popular posts from this blog

CONTOH MATERI PADA ACARA BUBAK KAWAH

POCAPAN TULADHA BUBAK KAWAH Hamiwiti mbubak kawah anggenipun kagungan hajat mantu Bapa.............. sekaliyan. Megaring songsong agung sinareng binukaning warana tutuping sesaji, netepi darmaning asepuh sayekti yen mantu sepisanan ngawontenaken acara bubak kawah, dene menawi wuragil ngawontenaken acara tumplak punjen. Bubak kawah den saranani mbuka kendhaga mulya, hiya den arani kendhaga kencana. Sareng binuka tutuping kendhaga ana cahya seta ingkang winastan CUPU ADI MONDHALIKA , lan wonten cahya rekta ingkang winastan CUPU MANIK ASTAGINA . Cupu Adi Mondhalika dumadi saking rahsaning bapa, Cupu Manik Astagina dumadi saking rahsaning biyung. Manunggaling rasa mulya nyarengi dhumawahing mangsakala kodrating kawasa, biyung hanggarbini. ·          Setunggal wulan hanggarbini winastan EKO KAMANDANU ·          Kalih wulan winastan DWI PANUNGGAL ·        ...
Post a Comment
Read more

ACARA SERAH TERIMA (PASRAH LAN PANAMPI)

ATURIPUN PAMBIWARA NGATURI PASRAH DHUMATENG TETUANGGANING ROMBONGAN TEMANTEN KAKUNG Para tamu kakung miwah putri ingkang satuhu bagya mulya, lulus raharja praptanipun rombongan temanten kakung samangke tetuangganing rombongan sampun pinarak jumeneng wonten ing sasana pasrah, awit saking menika sasana miwah pandayawara kasumanggakaken dhumateng tetuangganing rombongan, sumangga nuwun. CONTOH PASRAH TEMANTEN BADHE PANGGIH Assalamu’alaikum Warohmatullahi Wabarokatuh Bapa / Rakamas ............... ingkang wekdal menika ngemban wajib luhur wonten madyaning pawiwahan minangka sulih sarira panjenenganipun Bapa ................ sekaliyan garwa (ingkang mengku gati), ingkang winantu hing pakurmatan. Sowan kula wonten ngarsa panjenengan hangirit panekaring putra pinanganten kakung ginarubyuk santana warga, inggih awit kula ngemban wajib minangka dados duta sarayanipun Bapa .................... sekaliyan garwa ingkang pidalem hing .................... Sakderengipun kula ma...
Post a Comment
Read more

KIRAB KASATRIYAN PADA ACARA PERNIKAHAN JAWA ADAT SURAKARTA

PAMBIWARA NYAOSI PIRSA BILIH PINANGANTEN SAMPUN RAMPUNG ANGGENIPUN GANTOS AGEMAN, NUNTEN BADHE KASOWANAKEN ING SASANA PAHARGYAN Para tamu ingkang winantu ing pakurmatan, pambiwara sampun nampi sasmita saking paran para, bilih wekdal menika pinanganten sampun silih busana............... Dene Ki Subamanggala, inggih Ki Manggalasuba sampun siyaga hanyowanaken pinanganten, candranipun sami katingal gembira ing wardaya prasasat sinuba-suba penggalihe. (Nunten mungel Subakastawa Sl.9). CONTOH KIRAB KASATRIYAN Suren-surem dewangkara kingkin, katawung ing himandha, bebasan soroting surya kalingan mega, padhanging swasana kendih saking busananing temanten. Duk nalika busana kanarendran katingan kados raja lan prameswari, sareng sampun busana kasatriyan candrane pinda satriya taruna ingkang ndaweg cangkrama sekaliyan garwa, mangengar-enggaring driya. Tindhakira handerek’aken manggalasuba ingkang sampun piniji, pranyata pantes kalamun kinarya tuladha. Sinten ta ingkang lumaksana ka...
Post a Comment
Read more